अहिल्यानगर- जिल्ह्यातील पाणी टंचाईच्या समस्येवर कायमस्वरूपी तोडगा काढण्यासाठी राज्य सरकारने महत्त्वाकांक्षी पावलं उचलली आहेत. सह्याद्रीच्या घाटमाथ्यावरून समुद्रात वाहून जाणारं पाणी तुटीच्या खोर्यात वळवण्यासाठी गोदावरी खोर्यात चार नदीजोड प्रकल्प राबवले जाणार आहेत, अशी माहिती जलसंपदा व पालकमंत्री राधाकृष्ण विखे पाटील यांनी दिली.
मुख्यमंत्री देवेंद्र फडणवीस यांच्या धोरणात्मक निर्णयामुळे हे प्रकल्प गतीमान होणार असून, यामुळे पाणीटंचाईवर मात करणं शक्य होईल. शनिवारी, १९ एप्रिल २०२५ रोजी जिल्हाधिकारी कार्यालयात आयोजित आढावा बैठकीपूर्वी पत्रकारांशी बोलताना विखे पाटील यांनी ही माहिती दिली.
नदीजोड प्रकल्पांचा निर्णय
राज्यात नवीन धरणं बांधण्यासाठी जागेची कमतरता आहे, याकडे विखे पाटील यांनी लक्ष वेधलं. यापूर्वी चितळे समितीने १२ नवीन धरणांचा प्रस्ताव मांडला होता, परंतु सध्याच्या परिस्थितीत विद्यमान धरणांमधील पाण्याची तूट भरून काढण्यासाठी नदीजोड प्रकल्प हा प्रभावी पर्याय आहे.
“पावसाळ्यात वाहून जाणारं अतिरिक्त पाणी तुटीच्या खोर्यात वळवण्याचा मुख्यमंत्री देवेंद्र फडणवीस यांचा धोरणात्मक निर्णय आहे. जलसंपदा मंत्री म्हणून माझी जबाबदारी या प्रकल्पांना गती देण्याची आहे,” असं विखे पाटील यांनी सांगितलं.
पिण्याच्या पाण्याला प्राधान्य
पाणीटंचाईच्या पार्श्वभूमीवर राज्यातील धरणांमधील पाणीसाठा आणि इतर महत्त्वाच्या मुद्द्यांवर चर्चा करण्यासाठी २३ एप्रिल २०२५ रोजी जलसंपदा अधिकाऱ्यांची विशेष बैठक आयोजित करण्यात येणार आहे. “पिण्याच्या पाण्याला सर्वोच्च प्राधान्य असेल. त्यानंतर शेतीसाठी पाणी उपलब्ध केलं जाईल,” असं विखे पाटील यांनी स्पष्ट केलं. या बैठकीत पाणी वितरणाचं नियोजन आणि टंचाईग्रस्त भागांना प्राधान्य देण्याबाबत ठोस निर्णय घेतले जाणार आहेत. “पाण्याचं योग्य नियोजन करून प्रत्येक गावापर्यंत पाणी पोहोचवण्याचा आमचा प्रयत्न आहे,” असं त्यांनी सांगितलं.
शालेय बससाठी सुरक्षा उपाय
शालेय विद्यार्थ्यांच्या सुरक्षेचा मुद्दा उपस्थित झाल्यावर विखे पाटील यांनी स्कूल बससाठी कठोर नियम लागू करण्याचं आश्वासन दिलं. “विद्यार्थ्यांच्या सुरक्षेसाठी स्कूल बसला जीपीएस सिस्टीम आणि सीसीटीव्ही कॅमेरे बसवणं अनिवार्य करावं. तसंच, बसच्या देखरेखीसाठी शाळेतील शिक्षकाची नियुक्ती करावी,” असं त्यांनी सांगितलं. यामुळे स्कूल बसच्या सुरक्षिततेची जबाबदारी निश्चित होईल आणि पालकांना मुलांच्या सुरक्षेची खात्री मिळेल. “विद्यार्थ्यांचं संरक्षण ही आमची प्राथमिकता आहे,” असं त्यांनी ठामपणे सांगितलं.
संत शेख महंमद महाराज वादावर भाष्य
श्रीगोंदा येथील संत शेख महंमद महाराज देवस्थानाशी संबंधित सुरू असलेल्या वादाबाबत विचारलं असता, विखे पाटील यांनी स्थानिकांनी सहमतीने हा प्रश्न सोडवावा, असं आवाहन केलं. “हा विषय गावकऱ्यांनी एकत्र बसून सोडवायला हवा. बाहेरील लोकांनी हस्तक्षेप करणं योग्य नाही,” असं त्यांनी सांगितलं. संत शेख महंमद महाराज हे श्रीगोंद्याचं ग्रामदैवत असल्याने या वादावर तोडगा काढण्यासाठी स्थानिक पातळीवर चर्चा होणं गरजेचं आहे, असं त्यांनी सुचवलं.
राजकीय चर्चांना उत्तर
उद्धव ठाकरे आणि राज ठाकरे यांच्या एकत्र येण्याच्या चर्चांबाबत पत्रकारांनी प्रश्न विचारला असता, विखे पाटील यांनी याचा राजकीय परिणाम होणार नसल्याचं सांगितलं. “कोणी एकत्र आलं तरी लोकांचा महायुतीवरील विश्वास कमी होणार नाही. लोकसभा आणि विधानसभा निवडणुकीत जनतेने महायुतीला पाठिंबा दिला आहे,” असं त्यांनी सांगितलं.
पाणी नियोजन
नदीजोड प्रकल्प आणि पाणी नियोजनाच्या माध्यमातून राज्यातील पाणीटंचाईवर कायमस्वरूपी तोडगा काढण्याचा सरकारचा प्रयत्न आहे. “सह्याद्रीच्या घाटमाथ्यावरून वाहून जाणारं पाणी वाचवून तुटीच्या खोर्यात आणलं, तर पाण्याची समस्या मोठ्या प्रमाणात सुटेल,” असं विखे पाटील यांनी सांगितलं.
