संगमनेर – उत्तराखंड येथे झालेल्या राष्ट्रीय खेळ स्पर्धेत एमटीबी (पहाडी सायकलिंग) या प्रकारात दोन सुवर्णपदके पटकावणारी अहिल्यानगरची ‘फ्लाईंग स्किरल’ प्रणिता सोमण सध्या ‘एशियन गेम्स’ साठी सज्ज झाली आहे. अकोले तालुक्यातील फोफसंडीच्या पहाडी रस्त्यावर, म्हणजे हरिश्चंद्रगड अभयारण्यात तिच्या सरावाचे ठिकाण आहे.
प्रणिता प्रफुल्ल सोमण ही मूळ कोतूळ, ता. अकोले येथील रहिवासी आहे. तिची आई डॉ. स्वाती सोमण आणि वडील डॉ. प्रफुल्ल सोमण आयुर्वेदिक डॉक्टर असून, संगमनेर येथे त्यांचा व्यवसाय आहे. प्रणिताची मोठी बहीण मुक्ता अभिनेत्री आहे. वर्गात सर्वात हुशार असलेली प्रणिता यांची शालेय जीवनातील शिक्षण आदर्श विद्यालय, संगमनेर येथे झाले. शालेय जीवनात तिला रस्सीखेच, धावणे आणि बुद्धीबळ या खेळांमध्ये गती होती. मात्र, तिला साहसी खेळ करण्याची प्रबळ इच्छा होती. मुलगी असल्याने अनेक मर्यादा होत्या.
तिच्या वडिलांना सायकलिंगची आवड होती, आणि प्रणिता वडिलांसोबत सराव करू लागली. ती आठव्या इयत्तेत असताना, मालपाणी परिवाराने संगमनेर येथे सायकलिंग स्पर्धा आयोजित केल्या होत्या. नऊ किलोमीटर अंतराच्या या स्पर्धेत, एकवीस वर्षांच्या स्पर्धकांशी स्पर्धा करत तिने दुसऱ्या क्रमांकाचा मान मिळवला. येथूनच तिच्या सायकलिंग जीवनाची यशस्वी घोडदौड सुरू झाली. दहावीच्या बोर्डाच्या परीक्षेत तिला ९७% गुण मिळाले.
अकरावीच्या वर्गात प्रवेश घेताना सायकलिंगचा सराव कोठे करायचा हा प्रश्न होता. पुण्यात राजू भापकर हे प्रशिक्षक होते, म्हणून तिने बी.एम.सी.सी. कॉलेज, पुणे येथे अकरावीत प्रवेश घेतला. सराव सुरू झाला. बारावीचे वर्ष असल्याने पुन्हा नगरच्या सारडा कॉलेज मध्ये प्रवेश घेतला. अभ्यास आणि खेळ या दोन्हींना तिने समान न्याय दिला. मेहनतीच्या जोरावर बारावीत ९०% गुण मिळवले. त्यानंतर तिने पेमराज सारडा महाविद्यालय, अहिल्यानगर येथे बी. कॉम आणि एम. कॉम पूर्ण केले.
प्रणिता सोमण हिने सायकलिंगमध्ये मिळवलेली यशे आणि तिचा अथक परिश्रम यामुळे ती ‘फ्लाईंग स्किरल’ म्हणून ओळखली जाते. आता ती एशियन गेम्ससाठी सज्ज झाली असून, तिच्या कामगिरीने संपूर्ण संगमनेरचा, अकोलेचा आणि महाराष्ट्राचा मान वाढवला आहे. तिच्या यशावरून हे सिद्ध होते की, मेहनत आणि चिकाटीच्या जोरावर कोणत्याही आव्हानाला पार करता येते.
प्रणिताच्या भविष्यातील वाटचाल कशी होईल, हे पाहणे खूपच रोमांचक ठरणार आहे. तिच्या यशाच्या या पायऱ्या अजूनही तिच्या मेहनतीने चढत राहतील, असा विश्वास तिच्या कुटुंबीय आणि प्रशिक्षक व्यक्त करतात.
