संगमनेर – पोलिसांना खोटी माहिती देत जबरी चोरीचा बनाव रचणाऱ्या एका व्यक्तीचा पर्दाफाश करत पोलिसांनी चार जणांना अटक केली आहे. तसेच, या घटनेत वापरलेली गाडी आणि साडेपाच लाख रुपयांचा मुद्देमाल हस्तगत करण्यात आला आहे. दि. ३१ जानेवारी रोजी रात्री फिर्यादी दीपक किसन कदम (वय ४२, व्यवसाय – ट्रक चालक, रा. राजगुरूनगर, जि. पुणे) यांनी पोलिसांत धाडसी दरोड्याची फिर्याद दिली होती. त्यांच्या म्हणण्यानुसार, ते पुण्यातून नाशिकला औषधांनी भरलेली पिकअप गाडी (क्रमांक – एम.एच. १२ ए.झेड. ७८७६) घेऊन जात असताना संगमनेर टोल नाका येथे दोन अनोळखी प्रवाशांनी लिफ्ट मागितली.
गाडी थांबताच मागच्या बाजूला बसलेल्या इसमाने गावठी कट्टा फिर्यादीच्या दिशेने रोखला आणि त्याच्यासोबतच्या दुसऱ्या साथीदाराने त्याला बेहोश केले. त्यानंतर त्यांनी गाडी पळवून नेली आणि मुद्देमाल लंपास केला, असा आरोप फिर्यादीने पोलिसांकडे केला होता.
पोलिसांचा तपास आणि सत्य उजेडात
घटनेचे गांभीर्य लक्षात घेऊन घारगाव पोलिसांनी तातडीने तपास सुरू केला. पथकाने घटनास्थळाचा बारकाईने अभ्यास केला आणि सीसीटीव्ही फुटेजच्या आधारे शोधमोहीम राबवली. तपासादरम्यान पोलिसांना फिर्यादीच्या कथेत अनेक विसंगती आढळल्या.
संशयित व्यक्तींना ताब्यात घेतल्यानंतर चौकशीत खळबळजनक माहिती समोर आली. स्वतः फिर्यादीनेच हा संपूर्ण बनाव रचल्याचे उघड झाले. फिर्यादी दीपक कदम याने आपल्याच ओळखीच्या साथीदारांसह हा कट रचून औषधांनी भरलेली गाडी गायब केली होती.
चार आरोपींना अटक, मुद्देमाल जप्त
या प्रकरणी पोलिसांनी पुढील आरोपींना अटक केली आहे – 1. साईदास खुनाथ गाडेकर (वय २७, रा. टेहळे, चाकण, ता. खेड, जि. पुणे) 2. तन्मय प्रकाश कळम (वय १९, रा. वाडा, राजगुरूनगर, ता. खेड, जि. पुणे) 3. नवनाथ दादाभाऊ काळे (वय २८, रा. टेहळे, चाकण, ता. खेड, जि. पुणे) 4. फिर्यादी दीपक किसन कदम (वय ४२, रा. राजगुरूनगर, जि. पुणे) पोलिसांनी गुन्ह्यात वापरलेली पिकअप गाडी तसेच ५,७३,९१९ रुपयांचा मुद्देमाल जप्त केला आहे. आरोपींविरुद्ध गुन्हा दाखल करण्यात आला असून पुढील तपास सुरू आहे.
पोलिसांचा इशारा – खोटी तक्रार दिल्यास कारवाई अटळ!
सदर घटनेनंतर पोलिसांनी नागरिकांना इशारा दिला आहे की, कुठल्याही प्रकारे खोटी तक्रार देऊन कायद्याचा गैरवापर करणाऱ्यांविरोधात कठोर कारवाई केली जाईल. या घटनेमुळे पोलिसांची वेळ आणि संसाधने वाया जातात, त्यामुळे अशा कृत्यांवर कठोर दंडात्मक कारवाई केली जाईल.
