अहिल्यानगर – शहरातील प्रमुख रस्त्यांवर आणि फुटपाथवर बंद अवस्थेत लावण्यात आलेली जुनी वाहने तसेच अनधिकृत विक्रेत्यांचे अतिक्रमण यामुळे रहदारीस अडथळा निर्माण होत आहे. यावर कारवाई करत महानगरपालिका ही वाहने जप्त करणार असल्याचा इशारा आयुक्त तथा प्रशासक यशवंत डांगे यांनी दिला आहे.
शहरातील स्वच्छता आणि वाहतूक सुरळीत ठेवण्यासाठी महानगरपालिकेने कडक भूमिका घेतली असून, सर्व प्रभाग अधिकाऱ्यांना आणि अतिक्रमण निर्मूलन विभागाला तातडीने मोहीम राबवण्याचे आदेश देण्यात आले आहेत. संबंधित वाहन मालकांनी आणि अनधिकृत विक्रेत्यांनी स्वतःहून अतिक्रमण हटवावे, अन्यथा त्यांच्यावर कठोर कारवाई केली जाईल, असा इशाराही त्यांनी दिला आहे.
वाहतूक कोंडी आणि अस्वच्छतेवर महानगरपालिकेची कारवाई
नुकत्याच झालेल्या महानगरपालिका बैठकीत, मिस्किन मळा रोड, जुने कोर्ट रोड, स्वामी विवेकानंद चौक, लालटाकी अप्पू चौक ते सर्जेपुरा, साईनगर, भोसले आखाडा, कोठला, नवीपेठ, तोफखाना व मध्य शहर परिसरातील प्रमुख रस्त्यांवर अनेक जुनी आणि बंद अवस्थेतील वाहने लावण्यात आल्याचे आढळले. यामुळे वाहतुकीस अडथळा निर्माण होत असून, अस्वच्छताही वाढत आहे.
महानगरपालिका कलम २३० व २३१ अंतर्गत कठोर कारवाई
महानगरपालिका अधिनियम कलम २३० व २३१ अंतर्गत ही वाहने बेवारस समजून जप्त करण्यात येणार आहेत. वाहनधारकांनी स्वतःहून ही वाहने हटवावीत, अन्यथा कठोर कारवाईला सामोरे जावे लागेल.
तसेच, दिल्लीगेट ते चितळे रोड हा महत्त्वाचा रहदारीचा मार्ग असून, येथे अनधिकृत विक्रेत्यांनी मोठ्या प्रमाणात अतिक्रमण केले आहे. या विक्रेत्यांनी आपल्या जागा त्वरित रिकाम्या कराव्यात, अन्यथा त्यांच्यावर फौजदारी गुन्हे दाखल करून कठोर कारवाई केली जाईल, असेही प्रशासनाने स्पष्ट केले आहे.
नागरिकांना वाहन पार्किंग आणि व्यवसायाबाबत सूचना
नागरिकांनी आपल्या वाहनांची योग्य ठिकाणी पार्किंग करावी आणि रस्त्यावर अथवा फुटपाथवर व्यवसाय थाटून रहदारीस अडथळा निर्माण करू नये. नियमांचे पालन न केल्यास दंडात्मक कारवाई करण्यात येईल, असेही आयुक्तांनी सांगितले आहे.
महानगरपालिकेच्या या कठोर भूमिकेमुळे शहरातील वाहतूक कोंडी आणि अस्वच्छतेस आळा बसेल, अशी अपेक्षा व्यक्त केली जात आहे.
